Oktyabrın 17-də Hərb Tarixi Muzeyində Azərbaycanın dövlət müstəqilliyinin bərpa edilməsinin 33 illiyi münasibətilə “Milli sərvətimiz - müstəqilliyimiz!” adlı tədbir keçirilib.
Muzeyin mətbuat xidmətindən verilən məlumata görə, tədbirdə A.M.Şərifzadə adına Mədəniyyət Mərkəzinin, Bakı Hərbi Kollecinin, Müdafiə Nazirliyinin idarə və müəssisələrinin nümayəndələri iştirak ediblər.
Əvvəlcə Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.
Tədbirdə muzeyin rəisi ehtiyatda olan polkovnik Əzizağa Qənizadənin “Xalqımızı müstəqilliyə aparan yol”, muzeyin tədqiqatçı-baş elmi işçisi Vahid İsmayılovun “Müstəqillik uğrunda milli azadlıq mübarizəsi” mövzusunda məruzələri dinlənilib və müzakirələr aparılıb.
Qeyd olunub ki, Müstəqilliyin Bərpası Günü tariximizin ən şərəfli səhifələrindən biridir. Sovet imperiyasının dağılması Azərbaycan xalqına öz müstəqilliyini bərpa etmək imkanı verdi. 1991-ci il oktyabrın 18-də Azərbaycan Respublikası Ali Sovetinin sessiyasında “Azərbaycanın dövlət müstəqilliyi haqqında Konstitusiya Aktı” qəbul olundu. Bu mühüm tarixi sənədlə xalqımız uzun illərdən bəri həsrətində olduğu azadlığına qovuşdu.
Vurğulanıb ki, Vətən müharibəsində Zəfərin əldə olunmasında dövlət-xalq-ordu birliyi öz sözünü dedi.
Tədbirdə 18 Oktyabr - Müstəqilliyin Bərpası Gününə həsr olunan sənədli film nümayiş edilib. A.M.Şərifzadə adına Mədəniyyət Mərkəzinin solistlərinin ifasında hərbi-vətənpərvərlik mahnıları səsləndirilib.
