Ukrayna Ali Radası 25 yaşına çatmamış kişilərin səfərbər olmasını qadağan edən qanun qəbul edib.
Bu barədə ukraynalı deputat Aleksey Qonçarenko öz "Telegram" kanalında məlumat verib.
Onun sözlərinə görə, qanun layihəsi oktyabrın 9-da keçirilmiş iclasda qəbul edilib. Deputat vurğulayıb ki, 18 yaşlı uşaqları səfərbər etmək biabırçılıqdır. A.Qonçarenko əlavə edib ki, gənc əsgərlərin tərxisinə nail olmaq üçün mübarizə aparmağa davam edəcək.
Xatırladaq ki, daha əvvəl Aleksey Qonçarenkonun sözlərinə görə, hakimiyyət artıq səfərbər edilmiş şəxslərin tərxis olunması hüququnu bu qanun layihəsinə daxil etmək istəmir. Rəsmi Kiyev narahatdır ki, ordunun döyüş qabiliyyəti zərər görə bilər. Buna görə də onlar 18-25 yaşlı ukraynalı çağırışçılar üçün fərqli mexanizm və müddətlərdə ayrıca qanun hazırlamaq planlaşdırır.
