Lənkəranda Prezident mükafatçısı, yazıçı-ekoloq Bəxtiyar Hüseynovun müəllifi olduğu “Yaşıl dünya naminə” kitabının təqdimatı keçirilib.
Mərasimdə deputatlar, alimlər, rayon rəsmiləri, ziyalılar iştirak ediblər.
Çıxışlarda bildirilib ki, Prezident İlham Əliyevin Sərəncamı ilə 2024-cü ilin ölkəmizdə “Yaşıl dünya naminə həmrəylik ili” elan edilməsi və bu istiqamətdə həyata keçirilən tədbirlər ətraf mühitin mühafizəsinə və iqlim dəyişmələrinin fəsadlarının aradan qaldırılmasına yönəlib. Həmçinin diqqətə çatdırılıb ki, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un Bakıda keçirilməsinə sayılı günlər qalıb. Azərbaycanın belə bir beynəlxalq tədbirə ev sahibliyi etməsi ölkəmizin iqlim dəyişiklikləri ilə mübarizədə oynadığı mühüm roldan, eləcə də bu istiqamətdə gördüyü önəmli işlərdən xəbər verir.
Qeyd olunub ki, "Yaşıl dünya naminə" kitabı ictimaiyyətin ekoloji maarifləndirilməsinə bir töhfədir. Kitab iqlim dəyişikliklərindən irəli gələn fəsadlara, təbii fəlakətlərə qarşı mübarizəyə həsr olunub. Müəllif, həmçinin kitabda bəşəriyyətə çağırış edərək, yaşıl dünya naminə bütün səyləri birləşdirməyin vacibliyini vurğulayır.
