Azərbaycanda hər 3 abituriyentdən biri tam istəmədiyi və ya məcburiyyət qarşısında qaldığı ixtisası seçir.
Dövlət Məşğulluq Agentliyinin Mərkəzi Karyera filialının apardığı sorğuda belə nəticəyə gəlinib.
Bildirilib ki, sorğuda bakalavr təhsilini 2003-2014-cü illərdə Azərbaycanda almış 1583 nəfər iştirak edib. Hesabatda qeyd olunur ki, sorğudan əldə edilən nəticələr həmin illər arasında bakalavriat pilləsində təhsilə başlayan 355.093 nəfəri təmsil edir.
Respondentlərin 65%-i ixtisas və qrup seçimlərinin şəxsi seçimləri olduğunu, 20% respondent ailəsinin məsləhəti ilə, 7% respondent isə müəllimlərinin tövsiyəsi ilə bu seçimi etdiklərini bildirib.
Sorğunun nəticələrinə görə, respondentlərin 63%-i istədiyi ixtisasa qəbul olduğu halda, 37%-i qismən uyğun olan və ya tam olaraq istəmədiyi ixtisasa qəbul olduğunu qeyd edib.
"Bu da onu deməyə əsas verir ki, təxminən hər 3 nəfərdən biri tam istəmədiyi və ya məcburiyyət qarşısında qaldığı ixtisası seçir. Bu məqam gələcəkdə həmin şəxslərin ixtisas dəyişimi kimi məsələlərini ortaya çıxarır və həmin şəxslərin müəyyən bir müddətə də olsa işsiz şəxs kateqoriyasında qalmasına və nəticədə əmək bazarının yüklənməsinə gətirib çıxara bilir", - hesabat müəllifləri belə qənaətə gəlib.
