Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Təsadüfi deyil ki, ölkə Prezidentinin Sərəncamı ilə 2024-cü il “Yaşıl dünya naminə həmrəylik ili” elan edilib.
2025-ci ildə Azərbaycanda iqlim dəyişikliyi üzrə ayrılmış büdcə vəsaitləri də daxil olmaqla bütövlükdə "yaşıl büdcə xərcləri"ndə 16%-dən çox artım nəzərdə tutulub.
Crossmedia.az xəbər verir ki, bu barədə millət vəkili Naqif Həmzəyev Modern.az-a açıqlamasında bildirib.
Onun sözlərinə görə, Azərbaycan uzun illərdir ki, yaşıl enerjiyə keçidi təmin etmək üçün mərhələli şəkildə layihələr həyata keçirir:
“Azərbaycan ilk növbədə işğaldan azad olunmuş Qarabağ və Şərqi Zəngəzurda yaşıl iqtisadiyyatın təşkil edilməsi, yaşıl enerjinin formalaşdırılması və ağıllı şəhər, kənd və qəsəbə konsepsiyalarının həyata keçirilməsini reallaşdırır. Bu baxımdan da yaşıl büdcə xərclərinin artırılması zərurətdir. Eyni zamanda Azərbaycan ənənəvi enerji resurslarının ixracatçısı olmaqla yanaşı yaşıl enerjinin də Avropa bazarlarına çıxarılmasını həyata keçirmək istəyir. Bununla bağlı konkret müqavilələr və layihələr var”.
Millət vəkili bildirib ki, yaşıl enerjinin istehsal edilməsi ilə bağlı Azərbaycana çoxlu miqdarda investisiyalar qoyulub:
“Beynəlxalq şirkətlər və korporasiyalar tərəfindən bu layihələr Azərbaycanla birlikdə həyata keçirilir. Bu baxımdan da 2025-ci ildə yaşıl büdcə xərclərinin artırılması zərurətdir. Biz düşünürük ki, yaşıl büdcə xərclərinin artırılması ilə ətraf mühitin qorunması, iqlim dəyişikliklərinin qarşısının müəyyən dərəcədə alınması və yaşıl enerjidən daha aktiv şəkildə istifadənin təmin edilməsi mümkün olacaqdır. Eyni zamanda böyük şəhərlərdə alternativ nəqliyyat vasitələrinin aktiv şəkildə istifadəsi üçün də təbliğat işlərini artırmalıyıq. Bununla bağlın konkret layihələr həyata keçirilməlidir. Bu gün sözügedən layihələrin reallaşdırılmasının şahidi oluruq”.
N.Həmzəyev vurğulayıb ki, bütün bunlarla yanaşı yaşıl örtük sahələrinin genişləndirilməsi və mövcud yaşıllıq ərazilərin qorunub saxlanması vacibdir:
“Düşünürəm ki, bu yalnız ekoloji tədbirlər deyil, dünyada mövcud olan yeni çağırışlara qoşulmaq və onların həyata keçirilməsidir. Bu baxımdan da Azərbaycanın COP29-a sahibliyi etməsi onu göstərir ki, ölkəmizin yaşıl gündəliyi çox zəngindir və iqlim dəyişikliyi ilə bağlı konkret proqramları və layihələri mövcuddur. Azərbayca bunları bu günə qədər uğurla həyata keçirib və bundan sonra da bu layihələr uğurla reallaşdırılacaq. İnanıram ki, yalnız hökumət deyil, bütün aidiyyəti qurumlar və vətəndaşlarımız da bu proseslərdə aktiv və fəal iştirak edəcək. Biz yaşıl enerjiyə keçidin təmin edilməsi, ətraf mühitin qorunması, ekoloji problemlərin qarşısının alınması və buna bənzər bir çox məsələlərin icrasında həmrəylik nümayiş etdirməliyik”.
