Macarıstana məxsus “MVM Upstream Private Limited Company” (“MVM Group”un törəmə şirkəti) Azərbaycanda filial açıb.
Bu barədə İqtisadiyyat Nazirliyi yanında Dövlət Vergi Xidmətindən (DVX) məlumat verilib.
Filial avqustun 30-da DVX-də qeydiyyatdan keçib. Filialın qanuni təmsilçisi Macarıstan vətəndaşı İstvan Nemetdir.
Xatırladaq ki, bu il iyunun 5-də “MVM Group” "Cənub Qaz Dəhlizi" (CQD) QSC-dən “Şahdəniz” layihəsində 5 % və “Azerbaijan Gas Supply Company Limited”dən (AGSC) “South Caucasus Pipeline Company”də (SCPC, Cənubi Qafqaz Boru Kəməri Magistralı) 4 % payın alınması haqqında saziş imzalanıb. Sövdələşmə 2024-cü il avqustun 30-da yekunlaşıb.
Qeyd edək ki, "Şahdəniz" perspektiv sahəsinin kəşfiyyatı, işlənməsi və hasilatın pay bölgüsü haqqında saziş 1996-cı il iyunun 4-də imzalanıb. “Şahdəniz” üzrə iştirak payları belədir: BP (operator – 29,99 %), “Lukoil” (19,99 %), “Cənub Qaz Dəhlizi” (16,02 %), “NİKO” (10 %), “MVM Group” (5 %).
“Şahdəniz” yatağından qaz və kondensat hasilatına 2006-cı ilin dekabrında başlanılıb və hazırda hasilat “Mərhələ-1” çərçivəsində “Alfa” platformasından, “Mərhələ-2” çərçivəsində isə “Bravo” platformasından həyata keçirilir.
