Azərbaycan Milli QHT Forumunun "Yaşıl zona"da 50 kvadratmetrlik pavilyonu olacaq. İstənilən QHT, Forumun üzvü olan təşkilat COP günlərində oradan istifadə edə biləcək.
Azərtac xəbər verir ki, bu sözləri Prezident Administrasiyasının QHT-lərlə iş və kommunikasiya şöbəsinin QHT-lərlə iş sektorunun müdiri Tural Əliyev Azərbaycanda Beyin Mərkəzləri Platformasının və onun internet portalının təqdimatı ilə əlaqədar keçirilən tədbirdə söyləyib.
O bildirib ki, ötən il “Mavi zona”ya Azərbaycandan, sadəcə, bir təşkilat düşə bilmişdi. COP29-a Azərbaycanın ev sahibliyi etməsi imkan yaratdı ki, daha 4 təşkilat, ümumilikdə isə 5 təşkilat oraya daxil edilsin. Dünya üzrə 3600-ə yaxın QHT COP yanında müşahidəçi statusuna malikdir və onlardan 5-i Azərbaycana məxsusdur.
