Azərbaycan Respublikasının İnsan Hüquqları üzrə Müvəkkili (Ombudsman) Aparatı və BMT-nin İnkişaf Proqramının (BMTİP) ölkəmizdəki nümayəndəliyinin birgə əməkdaşlığı çərçivəsində Qəbələ şəhərində “İqlim dəyişikliyi və insan hüquqları: Gənc baxış” mövzusunda seminar təşkil olunub.
Ombudsman Aparatının mətbuat xidmətindən verilən məlumata görə, seminarda Ombudsman Aparatının təşkilatçılığı və BMTİP-nin dəstəyi ilə cari ildə hakaton formatında baş tutan “İqlim dəyişikliyi və insan hüquqları” mövzusuna həsr edilmiş araşdırma-yazı müsabiqəsinin iştirakçıları ilə yanaşı, Ombudsman Aparatında könüllülük proqramı çərçivəsində fəaliyyət göstərən gənclər də iştirak ediblər.
Seminarın açılışında Ombudsman Aparatının Beynəlxalq təşkilatlar və vətəndaş cəmiyyəti institutları ilə əməkdaşlıq şöbəsinin müdiri Zaur Vəliməmmədli çıxış edərək, ombudsman Səbinə Əliyevanın təşəbbüsü ilə insan hüquqları sahəsində həyata keçirilən maarifləndirmə tədbirləri barədə geniş məlumat verib.
İqlim dəyişmələri ilə bağlı problemlərə diqqət çəkən şöbə müdiri ekoloji hüquqlarla bağlı maarifləndirmə işinin daha da genişləndirilməsinin, bu sahədə gənclərin fəal iştirakının əhəmiyyətini vurğulayaraq cari ildə ölkəmizin ev sahibliyi edəcəyi COP29, bu istiqamətdə həyata keçirilən müxtəlif tədbirlər, o cümlədən ombudsmanın təşəbbüsü ilə baş tutan və otuzdan çox ölkənin milli insan hüquqları müvəkillərinin, institutlarının və beynəlxalq ekspertlərinin təmsil olunduğu Ombudsmanların Beynəlxalq Bakı Forumundan danışıb. Seminarda iqlim dəyişikliyi kimi qlobal problemlərin həlli istiqamətində fikir mübadilələrinin aparılmasında bu cür tədbirlərin vacibliyi xüsusilə qeyd olunub.
Sonra iqlim dəyişikliyinin insan hüquqları kontekstində təhlili və bu mövzuya gənclərin diqqətinin yönləndirilməsi məqsədi daşıyan interaktiv seminarda müsabiqə iştirakçılarının komanda şəklində hazırladıqları videoçarxlar nümayiş etdirilib.
Daha sonra Ombudsman Aparatının əməkdaşları Aydan Talıbova və Şəhla Aslanovanın təlimçi qismində iştirakları ilə seminar keçirilib, iştirakçılar arasında qrup şəklində müzakirələr və "İqlim dəyişikliyinin əhalinin fərqli qrupları üzərində təsiri" mövzusunda kazuslara əsaslanan interaktiv rol oyunu təşkil edilib.
