Ukrayna Dövlət başçısı Volodimir Zelenski, Şimali Koreyanın rus qüvvələrinə əsgər göndərdiyini iddia edib. Bu vəziyyətin Ukraynanın müdafiə əlaqələrini yenidən qiymətləndirməyi tələb etdiyini deyib: “Rusiya ilə Şimali Koreya kimi rejimlər arasında artan bir ittifaq görürük. Artıq məsələ yalnız silah transferi deyil. Əslində məsələ Şimali Koreyadan işğalçı qüvvələrə insan transferidir. Aydındır ki, bu kimi vəziyyətlərdə tərəfdaşlarımızla əlaqələrin inkişaf etdirilməsi lazımdır. Cəbhə xəttinin daha çox dəstəyə ehtiyacı var.” Ukrayna Dövlət Başçısı Volodimir Zelenski, xalqa müraciətində, Şimali Koreyanın Ukraynadakı Rusiya qüvvələrinə dəstək məqsədilə əsgər göndərdiyini irəli sürüb. Şimali Koreyanın bu hərbi addımı səbəbindən Ukraynanın da tərəfdaşları ilə müdafiə əlaqələrinin dəyişməli olduğunu deyib. Zelenskinin iddiası ilə yanaşı, Cənubi Koreya Müdafiə Naziri Kim Yong-Hyun da keçən həftə Şimali Koreyanın “böyük ehtimalla” Ukraynaya əsgər göndərdiyini bildirib.
Kremlin sözçüsü Dmitri Peskov isə Şimali Koreyanın əsgər göndərib-göndərmədiyinə dair suala, “Bu da başqa bir yalan xəbərə oxşayır” cavabını verib. Şimali Koreyanın rəsmi xəbər agentliyi olan Koreya Mərkəzi Xəbər Agentliyi keçən həftə yayımladığı bir məqalədə Rusiya və Şimali Koreya əlaqələrinə toxunub. Putin və Kim Çen Inun Pxenyan Sammitində əldə etdikləri yeni razılaşmanın hər iki ölkənin müharibə vəziyyətində təcili hərbi yardım göstərmək üçün mövcud bütün vasitələrdən istifadə etməsini əhatə etdiyini qeyd edib.
Qeyd etmək lazımdır ki, 14 fevral 2022-ci ildən başlayan müharibə Avropa dövlətlərinin və ABŞ-nin Ukraynaya hərbi-siyasi dəstəyi nəticəsində daha geniş miqyas aldı və almağa da davam edir. Bu vəziyyətin gələcəkdə necə inkişaf edəcəyini təxmin etmək çətindir. Hər iki tərəfin öz mövqelərində israrı onları diplomatik həll yolundan uzaqlaşdırır. Müharibənin humanitar, iqtisadi və siyasi nəticələri dünya miqysasında hiss edilməyə davam edir.
Ayhan Ağarzayev
